დიდხანს გიყურე... გეძინა...

და თან ვფიქრობდი,– ახლა მზის ნამით

რომ გესხივოსნო, რომ გაგაღვიძო,

ასე შიშველი, ასე მძინარე,

დილა ემგვანა თითქოს ღვინოს რომ

სუნთქვა დაგითროს, ხილვა–მდინარე

შემოეშიშვლოს ხილვა–ჩვენებას

და ისურნელონ ბაღი კვირტებმაც,

სიზმრად მიცურავს, მიესვენება,

მიყვარს, მომწონს და მესათნოება

ასეთი დილა... გეძინა...

თმები, ტუჩები, წელიც გიკრთოდა,

ტანზე მოგხვიეს ჩრდილი სხივებმა

ლოგინს აპნიეს მტვერი მინდორთა,

შემოუგროვეს თეძოებს სითბო,

ბროწეულიც კი დასკდა და შედგა,

თითქოს ოთახში შემოსვლას ითხოვს

თითქოს აპირებს გაწოლას შენთან,

...ხელი, ხალი, ყელი და წვივი,

ცხელი რკალით მუცლიდან ღვივის

და შენს სიზმარსაც მოუწევს მოცდა,

რიჟრაჟი ტკბობას დაგიწყებს როცა...

სიზმარს სიცხადედ ვერჩივნე,

ვფიქრობდი დავწვე შენს წინ ან

შენს უკან, შენთან, შენშივე,

დილას დაგხედე... გეძინა.